القائمة الرئيسية

الصفحات

فى امريكا .. بالتفصيل اهم النقاط للفائزين فى القرعة الامريكية منذ اعلان النتيجة وحتى السفر وكل ما سيحدث معك هناك

 
 كتب محمد الجارحى فى جروب امريكا شيكا بيكا
#في_أمريكا
بسم الله الرحمن الرحيم اعضاء جروب أمريكا شيكا بيكا الكرام السلام عليكم ورحمة الله وبركاته النقاط المئة التالية تفيريغ و ملخص لفديوهات 13 قناة يوتيوب و بثوث مباشرة ما يزيد عن 450 ساعة مشاهدة في خلال سنة من البحث او اكثر جزاهم الله خيرا عنا لتلك الافادة .هذا عمل لا ابغي به الا وجه الله تعالي . واعتذر عن اي اخطاء لغوية او املائية لضيق الوقت و عدم القدرة علي مراجعة النص لطوله . وان كان هناك اي اخطاء بتلك المعلومات بدون لغط او نزاع فهذه مجرد معلومات تحتمل الصواب و تحتمل الخطا مع عامل تغير الزمن فبعض قنوات اليوتيوم مر عليها اكثر من 5 سنوات يرجي التعليق عليها . انا برئ من اي استخدام لتلك المعلومات في امر حرمه الله تعالي . دمنا عونا وسندا لبعضنا البعض . وختاما نسالكم الدعاء

1. مصاريفك من اول ما تكسب لغاية شهر من غير عمل في امريكا وده وارد جدا 35 الف علي اقل تقدير وده لفرد واحد بالغ اعذب لو بأسرة ممكن توصل 55 الف

2. اول ما توصل اعمل حسابك انك هتبدا من تحت الصفر ولو في تحت اكتر من كده بس عندك فرص كتيرة تطلعك فوق الصفر بمراحل

3. ممكن تحجز في اوتيل يوم او يومين ترتتاح من سفرك بس اول ما تنزل اجري علي اقرب جامع هناك هتلاقي شغل و سكن زي جامع مصعب بن عمير في بايريدج-5افنيو

4. الجرين كارد انت لو دافع في مصر هتتاخر حوالي شهر او اكتر فا هتروح تعمل بطاقة ضمان اجتماعي ورخصة قيادة و هيوصلوك بعد اسبوعين اقل او اكتر حاجة بسيطة

5. الرخصة دي بتطلع ليك سواء كنت بتسوق او لا مافيش بطاقة زينا في مصر

6. الكل بيمشي بالرخصة دي ماحدش بيمشي social security ولا green card

7. مش اي حد يسالك علي السوشيال تديه له ممكن يحبسك بيه بكل سهولة

8. كل الورق اللي فات ده بقا تستلمه علي post box هتكون حاجزه من مصر بعد ما تاخد الفيزا كذا حد جربها وقال نفع اياك تخلي عنوان سكنك المؤقت وجه لاسلام ورقك

9. اعمل كارت مواصلات unlimited rides تمنه حوالي 120 دولار في الشهر

10. شركة موبيل AT&T فيها سرعة 5G المكالمات غير محدودة والنت 40GB بعد كده السرعة بتقل مش بيفصل بحوالي 60 دولار في الشهر ولو هتخلي الدفع مباشر من الفيزا بيتخفض لحوالي 45 دولار في الشهر

11. اول ما تاخد الجرين و السوشيال بتروح بانك تعمل depit card وتخلي المرتب direct deposet عشان يتحولك عليها علي طول

12. خلاص استقريت و هديت نحط قاعدة بقا عشان هتمشي عليها طول ما انت هناك ( ماتجيش علي صحتك البدنية و العقلية ابدا في مقابل الشغل لانهم هم راس مالك في اول بدايتك هناك لو تعبت ماحدش هينعك غير نفسك راعي صحتك جامد )

13. الجمعية العربية الامريكية في بايريدج لواحتجت اي مساعدة هيساعدوك

14. اعملك ملف زي ارشيف اي ورقى او وثيقة صورها وحطها فيه امريكا بلد الورق وماتستخفش باي ورقة تقابلها

15. كلام ليا قبل لكم واستاذ محمد الوكيل هيضحك عليا لازم تتعلم تطبخ . لازم تتعلم تطبخ . لازم تتعلم تطبخ .هيوفرلك نص تمن الاكل من برا او اكتر كمان

16. مش هتكلم عن cridet card و cridet score الادمنز اتكلمو عليه لما قالو يا بس ومش هقول اي احكام دينية فيه انتم اعلم بشؤن دنياكم عاوز تجادلني علي الخاص

17. قبل ما تروح اتعلم لغة و اتعلم حرفة هينفعوك في اول بدايتك هناك

18. العمل برضوا اتقتل بحث و بوستات و فديوهات من الادمنز

19. بلاش عربيات الاكل شغلها موسمي و بيقف في الشتا

20. المكسكان معظمهم غير شرعيين ومعاهم حرف لو عندك تصليحات غالبا هتلجا لهم لانهم ارخص من اللي شغال قانوني بس بيتحاسب كاش

21. ساعات العمل بالاسبوع 40 ساعة full time و الاجازة رسمي السبت و الاحد

22. طبعا مافيس اعزكم الله شطافات في الحمامات هناك امازون مليان شطافات اشكال و الوان و انواع اشتري اللي تعجبك

23. هتعاني في اول المصاريف عشان هتكون بتصرف من اللي حولته بالجنيه لدولار فا هتحس انك بتتكوي بس اول ما تقبض و تصرف بالدولار هترتاح زي ما بيقول المثل الجنيه جنيه بلده ماتقرنش العملتين ببعض و الا مش هتعرف تعيش

24. امريكا دولة مهجر يعني مافيش تحويش زي الخليج انت رايح تستقر و تعيش هناك والا ماتروحش عشان هتعذب نفسك علي الفاضي ( اللي صر و عاش احسن من اللي حوش و مات )

25. مافيش جمايل بين الامريكان كله بتمنه هناك بين العرب ممكن

26. الشغل الغير قانوني اهانة و رخيص بلاش منه احسن

27. افضل مكان كابداية للشغل الاكل لو ليك وجهة ظر تانية لك مطلق الحرية

28. لو معاك لغة اوعي تشتغل مع عرب هيستغلوك الا منرحم ربي . ابعد عنهم و غنيلهم احسن

29. لو حد علق علي الاكسنت قول اسباني عشان بعضهم معقد من العرب او اعمل عبيط وماتردش اصلا

30. دور علي تغل في مكان فيه union الاتحادالعمالي ده بيخدمك كتير و بيوفرلك مصالح كتير

31. معلومة مش متاكد منها لما يتاخد من عمل lay off مؤسسة العمالة بتصرفلك لغاية 6 شهور

32. الترقية كل سنة تقريبا

33. الجنسية هتاخدها بعد 5 سنين وشروطها موجودة في لايف حوالي ساعة عند استاذ هيثم علي اليوتيوب و اتهرت بحث و بوستات برضو

34. العمل الغير شرعي اول الكاش زي ما بنقول بحرمك التقرير الضريبي المهم للجنسية الامريكية

35. لازم تقرا عقد الايجار كويس و تترجمهلو مش بتعرف عشان غالبا بيبقا فيه ثغرات تلبسك في حيط لا قدر الله

36. اكتب قايمة بالحاجات البايطة اول ما تخل البيت وبلغ صاحب البيت بيها عشان التامين مايروحش عليك

37. لازم ورق لاي تعامل مادي زي شيكات المرتب و فاتورة لدفع ايجار او غيره كاثبات لحقك

38. ماحدش هياجرلك غير بضامن او يكون عندك شيكات لمرتب شهر

39. اي سعر في امريكا قبل الفصل فاصل و اوصل لسعر وسط و ماليش دعو باحكام دينية برضو

40. ماتخافش من صاحب الايجار لواتكسر عليك شهر القانون معاك خصوصا لو معك اطفال

41. نيويورك مش انضف ولاية في امريكا لكن مافيهاش عنصرية و هتساعدك علي التاقلم بسرعة

42. ماتديش لحد فرصة يستغلك لفترة طويلة خصوصا لو شغال مع عرب اكسب خبرة ولغة و اخلع

43. السخان و العاز و المايه لي صاحب البيت والكهربة و النت ة التلفزيون عليك

44. اخر شهر يناير Walmart بيعمل تخفيضات كبيرة

45. غالبا موسم التخفيضات من white Friday لغاية اخر شهر 2

46. الماركات بتعمل في الفترة دي جرد و بتعمل خصومات كبيرة زيTJ MAX وROSS و burlingto

47. سوبر ماركت BJ`s محل بيبيع بالجملة لو انتو عيلة هيوفر عليك كتير

48. Dollar tree هيوفر علك كتير ابقا شوف حاجتك فيه لو ارخص خدها لكن احيانا Walmart بيبقى ارخص منه

49. ماتنساش تبص برضو علي هابيتات اسعاره حلوة

50. موقع let go عليه اجهزة وسيارات مستعملة

51. ابقي بص علي facebook market عليه حاجات لقطة برضو

52. محلات بيع اثاث وحاجات مستعملة زي goodwill , the selvation , army store , family store

53. جرب amazon go محلات لامازون مافيهاش اي موظفين بتنزل تطبيقها وتخل تعيش حياتك بس الاسعار ماغرفش وضعها ايه

54. لو هتركب باص ومش معاك كريدت او كرت مواصلان خلي معاك الاجرة بالظبط لانه مابيرجعش باقي

55. اذا عندك اشتراك او ايجار وعاوز تلغيه لازم تبلغ قبلها بفترة عشان لو جيت ساعته هتلاقيه اتجدد تلقائي و لبست في الفلوس الايجار مصلا قبلها بتلت شهور

56. لو ماعندكش غسالة ومجفف في البيت هرتوح مجمع غسيل . افتح الغسالة من فوق و اتاكد ان مخازن المسحوق و المبيض فاضيين عشان هدومك ماتبوظش

57. لو في مجففين فوق بعض استخدماللي فوق و وافتح باب اللي تحت لتجفيف احسن

58. قبل بداية شهر 4 من كل سنة لازم تظبط ملفك الضريبي وتبعته لمصلحة الضرايب و ده بتخلصه عند مجاسب متخصص بيتكلف حوالي 150 دولار

59. وثيقة w4 دي بتملاها لصاحب العمل عشان الضرايب اللي هتتحجز من شيك المرتب

60. وثيقة w2 دي بتاعة الضرايب الزايدة اللي بترجعلك اخر السنة المالية

61. وثيقة D1099 بتمضيها لما تشتغل في مكان كاش بتفيد صاحب العمل انك هتسد عن نفسك الضرايب بشيك بتبعته لمصلحة الضرايب كل تلت شهور

62. الاكل وما ادراك ما الاكل لو انت فرد اعذب 500 دولار يغرقوك اكل

63. الاكل اللي مطبوع عليه U او K جوا دايرة كده ده معناك كوشر يعني اكل لليهود مافيهوش دعهون خنزير وحلال لينا

64. لما تشتري منكهات زي الفانيليا مثلا خلي بالك في المكونات من كلمة extract غالبا بتبقي فيها مشتقات كحول

65. بص في مكونات المنتيج اي انزيمات بتبقي مشتقة من الخنازير خصوصا الجبنة معظمها كده فا خلي بالك

66. في تطبيق اسمه halal check بيعرفك اذا كان الاكل ده حرام ولا حلال عن طريق البار كود اللي علي الاكل و طلبت من الاستاذ محمد الوكيل ان يتواصل مع دكتور ايمن عشان يجربه لينا يشوفع فعال ولا لا لانه في مصر مش شغال جزاهم الله خيرا

67. ومش هحكيلك بقا علي المحلات العربي و ما لذ و طاب بها

68. وانت مسافر البس لبس رياضي بلاش بدلة عشان هتتهان خصوصا لو ترانزيت

69. ليك شنطة علي ضهرك و شنطة في ايدك غير الشنطة اللي في بطن الطيارة

70. شنطة اليد حط فيها كاش و الباسبور بورقه

71. شنطة الظهر حط فيخا غيار زيادة عشان الظروف

72. لما بتروح تعمل check in بتاخد كعب لازم تحافظ عليه هو الضامن الوحيد للشنط بتاعتك

73. ادفع تامين علي الشنط وانت بتحجز التذاكر انت الكسبان في الاخر

74. خد المسكنات خصوصا الاسنان وادوية برد و المضاضات الحيوية القوية عشان الحاجات دي مابتتصرفش هناك غير بكشف وغالي جدا عليك في الاول بدون تامين والطب هناك ميري مافيهوش فصال خصوصا احنا كا مصريين بناخد مضاضات الحيوية 1000mg زي البونبوني ومابتحوقش فينا هناك الرقم ده مصيبة ومش بيتصرف بالسهل

75. مستحضرات النظافة و التجميل فب الاول هتنفعك برضو و ماتتكسفش انا اعرف ناس صفت كل حاجة هنا لها عشان تسافر لدرجة انهم واخدين حلل و شوك و معالق

76. بلاش اكل و سكاكين محبكتش القانون الدول بيمنع مرور اي شفرى اكبر من 12 سم تقربا فا ماتوديش نفسك في داهية

77. تقدر تاخد بور بانك معاك علي الطيارة


78. خد تحف مصرية وميداليات و سلاسل عليها اشكال فرعونية الحاجات دي بتبسطهمو هتنفعك في تكوين علاقات تطيبة

79. شوية حاجات كده لشراء العربيات هتعجبك

80. موقع true carبيديك سعر حقيقي للعربية عشان تعرف تفاصل مع الديلر

81. العربية بتمشي من 10 الي 12 الف ميل في السنة – احسب التاريخ حسب الموديل مع الاستهلاك عشان تقدر تمن العربية

82. في بعض شركات تامين العربيات بتاخد الناس اللي تاريخ قيادتها بقاله سنين نضيف باسعار تامينية قليلة جدا

83. تامين اسليارة بيقل كل 6 شهور نسبة . لا قدر الله حصل حادث تبدا تقل من جديد بعد تلت سنوات من اعلي شريحة سعريىة للتامين

84. في ورقة صفرة بتتلزق علي نمرة العربية من ورا زي رقم تسجيلي كده للترخيص . بيتسرق . شرحه بموس بعد ما يتلزق عشان اللي 
يسرقه يطلع حتت معاه

85. نمرة العربية اللي قدام مش مهمة اللي ورا هي اللي مهمة

86. ماينفعش تمشي بمصابيح او اشارات مكسورة او بايظة و ماينفعش تمشي بازاز مكسور

87. ورق التامين مايخرجش برا العربية و اول خبرة ليك في امريكا هتكون تيكت لمخالفة

88. بتاخد من الديلر حاجتين تسجيل ملكية و ورق بيع العربية

89. لو البوليس جه وراك وشغل السرينة اركن علي جنب براحة وماتنزلش الا اما يتطلب منك وماتعملش اي حركة مفاجئة عشان رد فعله هيكون عنيف اتحرك بامره و براحة

90. لاقدر الله وقفك شرطي اساله am I free to go ? لو قالك اه استاذن وامشي بدون قلة ادب او استفزاز ماتعملش لنفسك مشاكل

91. شرطة ice بتاعة الهجرة لو جتلك ماتردش عليهم ومن حقك تسال اي شرطي اذا كان منهم ولا لا

92. السبيل للعيشة الكريمة في البلد دي يا تعمل مشروع يا تعمل معادلة و تشتغل بشهادتك امريكا بلد الشهادات

93. لازم تتعلم علم ادارة المال وتعرف عنه وده مالوش دعوة بادارة مصروف البيت خالص

94. لو مابتخططش لحياتك وماشي بالبركة و جاي تلوش وتجرب حظك امريكا مش ليك

95. اياك ثم اياك ثم اياك و الاطفال . ممنوع اللمس و الاقتراب منهم شاور من بعيد و بس طفل هيحصله مشكلة نبه اهله وماتقربش له .عندهم شك دايما ان الغريب اللي بيقرب لولادهم بيتحرش بيهم

96. لو ولد الطفل صديقك ماتبوسش الطفل عشان خاطري معلش تعالي علي نفسك

97. الموبيل ده حياتك تقدر توثق بيه كل حاجة ورق موقف عنصري اي حاجة حصلتلك صور بيه و اثبت حقك . لو مش معاك واحد محترم اما تروح وربنا يرزقك هات واحد محتؤم وماتستخسرش في نفسك هينفعك اوي ولو مجالك محتاج لابتوب مش هوصيك علي شغلك يعني

98. الباسبور الابيض ده وثيقة ممكن تقعدك برا امريكا اكتر من 6 شهور لان ماينفعش تخرج براها اكتر من ست شهور بدون سبب فا هم بيراعو ان لو عندك دراسة تكمل او حد مريض او عندك شركة بتصفيها وماعرفش ممكن يطلع اكتر من مرة ولا لا و ماعرفش تمنه كام

99. حاجتين مهمين جدا بقا لازم ماتهملهمش و تفهمهم كويس اول حاجة اهلك لهم فضل عليك بعد ربنا طبعا فا ماتنساهمش من العز الي هتبقا فيه دوقهم من الحب جانب و الحاجة التانية لاقدر الله توفيت تكاليف الدفن غالية جدا فا حوش علي جنب لحاجة زي دي وماتقولش كده بتفول علي نفسك احسن يحرقك وتتبعت لاهلك رماد وكمان مش مسموح اي حاجة تتبعت لوطنك بعد الوافاة لا قدر الله

100. اهم حاجة بقا واهم من اللي فات ده كله دينك اهم من اي حاجة في الدنيا علاقتك بربنا وقربك منه اهم من الدنيا اللي عمالين نخطط لها ده كله هو اللي ساتر عليك و مقدرلك الخير واكرمك بسفرية زي دي ماتقصرش في حق دينك و قبل اي حاجة لازم تحدد نيتك تجاه هجرتك دي ( عن أمير المؤمنين أبي حفص عمر بن الخطاب رضي الله عنه ، قال : سمعت رسول الله صلى الله عليه وسلم يقول : ( إنما الأعمال بالنيّات ، وإنما لكل امريء مانوى ، فمن كانت هجرته إلى الله ورسوله ، فهجرته إلى الله ورسوله ، ومن كانت هجرته لدنيا يصيبها ، أو امرأة ينكحها ، فهجرته إلى ما هاجر إليه) رواه البخاري ومسلم في صحيحهما .
تم بحمد الله

تعليقات

تعليقان (2)
إرسال تعليق
  1. مرحبا انا مغربي اريد العمل في امريكا شكرا
    رقم الهاتف +212616346963

    ردحذف
  2. أنا أريد الهجرة إلى أمريكا وأنا مجد فؤاد طاهر أغا وانا من سوريا مدينة حلب أرجو مساعدتي كثيرآ بالهجرة إلى أمريكا رقم الهاتفي هو
    963959102269+

    ردحذف

إرسال تعليق