القائمة الرئيسية

الصفحات

اهم ثلاث اخطاء في تقديم فيزا امريكا واوربا وانجلترا

اهم ثلاث اخطاء في تقديم فيزا امريكا واوربا وانجلترا
من اكتر الحاجات المحبطة في السفر هي صعوبة استخراج التأشيرات للبلاد الي نفسنا نسافرها، خصوصا الدول الاوروبية وامريكا. للاسف الكتير مننا بيعمل اخطاء قاتلة قد تتسبب في رفض طلب الحصول على التاشيرة. من التجارب في استخراج عشرات التاشيرات والاسئلة الكتيرة الي بتيجي للجروب، خليني اقولكم على تلات اخطاء الي ممكن يكون سبب للرفض:
 
١- جواب دعوة من مستضيف
 
هو ده الي بيقولوا عليه السم في العسل!! كتير فاكرين اني لما اروح اقولهم في السفارة اني رايح ازور خالتي في امريكا ولا عمي في هولندا، السفارة هتطمن اني هلاقي حد يتكفل بمصاريف اقامتي وانا هناك.
 
بالعكس السفارة غالبا هتكون شاكة انك هتروح تبلط هناك في الخط زي هتكسر تاشيرة وتقعد هناك وتشتغل شغل غير شرعي والقصص دي. ارجوك لما تقدم على التاشيرة، قدم على اساس انك سايح فقط. احجز فندق واعمل برنامج للرحلة بتاعتك، وما تجبش سيرة حد هناك.
 
– طيب لو حضرتك قدمت بدعوة قبل كدة واترفضت، تعمل ايه في التقديم مرة اخرى بعد ٦ او ٣ شهور على الاقل؟
تقدم على انك سايح المرة دي من غير جواب دعوة. رايح نيويورك وميامي اتفسح اسبوعين …. “طيب مش هيكون الراجل في المقابلة عارف اني قدمت قبل كدة واترفضت علشان قولت ان خالتك عايشة في شيكاغو مثلا؟”
 
ممكن يكون عارف وممكن يكون مش عارف … “طيب والعمل؟”
لو سألك تعرف حد هناك، قوله لا معرفش حد … ممكن تعدي وخلاص.
 
لو اتفقست وطلع عارف…. واتزنقت وقالك انت مش خالتك عايشة في شيكاغو؟ لا تكذب!! قوله اه بس انا مش رايح شيكاغو، انا رايح اتفسح في نيويورك وميامي علشان احلى طبعا. مفيش مانع من شوية استهبال.
 
ولكن, لكل قاعدة شواذها, بعض الناس نجحت في الحصول على تأشيرة وهي معاها دعوة, ولكن قد يكون موقفهم الوظيفي والمادي كويس جدا. انا بتكلم هنا بلغة الاحتمالات. احتالات نجاحك اعلى بدون جواب دعوة. 
 
٢- كشف حساب من غير حركة او رصيد
 
احد اهم طلبات السفارة هي كشف حساب بنكي الخاص بالمرتب الشهري بتاعك، علشان ده بيثبت انك موظف وعندك دخل شهري ثابت …. “طيب افرض انا عليا قروض وجمعيات وبخلص مرتبي كل شهر؟ شكل كشف الحساب هيكون وحش وانا مقدمه فاضي كده؟ طيب استلف ٢٠ ولا ٣٠ الف من امي ولا ابويا ولا اقبض الجمعية بدري واحط الفلوس قبل ما اطبع كشف الحساب؟” …. غلط!!!
 
لو سمحت استلف المبلغ ده او اقبض الجمعية دي قبل ما تطبع كشف الحساب ب ٦ شهور، علشان لما تطبع كشف الحساب، يبان ان فيه فائض شهري من الفلوس هتصرفه على السفرية دي.
 
ممكن كمان تقدم كشف حساب كروت الائتمان بتاعتك لو فيها حركة شهرية كتير. بتكون دليل على انك مقتدر ماديا والفلوس معاك رايحة جاية.
 
طبعا ممكن تقدم حسابات توفير في البديد او بنوك تانية. ودائع بنكية في اي بنك آخر.
 
طيب لو مرتبك الشهري قليل، بس عندك فلوس في حسابات شخصية تانية، تعمل ايه؟ ….. ممكن تعمل ايداعات شهرية منتظمة في نفس تاريخ مرتبك. يعني مثلا المرتب ٢٠٠٠ جنية في الشهر، اعمل ايداع ب٥٠٠٠ مثلا في نفس تاريخ نزول مرتبك.
 
 لما تعمل المقابلة وحد سألك في السفارة، قول ان مرتبك مثلا جزء ثابت وجزء متغير بينزل منفصل كل شهر. كدة يبان ان في دخل شهري بمبلغ ٧٠٠٠ جنية مثلا. برضو الكلام ده تعمله لمدة ٦ شهور. اهم حاجة ان الحساب يكون فيه حركة سحب كمان علشان يكون شكله حلو.
لو انت طالب او عاطل، قدم كشف حساب والدك ووالدتك. حسابات جارية، حسابات توفير، ودائع بنكية،. اي مستندات بتثبت بيها انك مقتدر ماديا.
 
٣- التقديم على السفر بجواز سفر ابيض
 
انا عارف طبعا ان حلم اي حد عايز يسافر برة هو اوروبا وامريكا … عايزين نشوف بلاد نضيفة كدة ومحترمة!! اول مرة اسافر وحوشت فلوس وعايز اشوف الوجة الحسن بقى!! الحقيقة المؤلمة للأسف هى ان احتمالات الرفض بتكون اعلى بكتير لما تقدم على تاشيرة الشنجن او امريكا بجواز سفر ابيض يا ورد، من غير ولا سفرية قبل كدة. بيدي انطباعات مسبقة عند السفارة ان السفر ده عمره ما كان من اهتماماتك قبل كدة … وانك رايح فرنسا ولا امريكا علشان ما ترجعش.
 
نصيحتي ليك انك تحاول تسافر سفرية واحدة حتى، ويكون فيها بلدين مع بعض مثلا. بلاد الله واسعة وحلوة كتير، ومن غير تأشيرات او تأشيراتها سهلة. ممكن تعمل تركيا وجورجيا في رحلة واحدة مثلا. ماليزيا واندونسيا او تايلاند او فيتنام. كلها دول جنب بعضها وممكن تسافرهم في رحلة واحدة.
وعشان كده عملت موضوع حزمة التاشيرات ونجحت جدا

هل اعجبك الموضوع :

تعليقات